goleen ati qabdu
inni ati abdattu
kan addaan sinqoonne
beekte jirta atuu
irreen keetis waaqaa
irreen dhiibi saamtuu…
akkamiin irkattee
mataa jala bulta
boraatii muramtuu?
Irreen kee uumaadhaa
bulchaa walaabuutii
wanti wantaa’n geenne
si bulchina jettii
kittillayyoon jeejee
bor-si liqimsitii
har’arraa shurruqi dhiitee
jirti sitti sissiqii
goobani goobiitii xixxiixi…
xixxiixaan galgalaa
wayita golgolaa’aa
booratee ful’aa
foolleen bittinaa’aa
leemmoodha ree lammiin…
garaansaa taliilaa
halkan tokko bulee
obboroosaa moo’a!
jiruuf jireenyi kee
jaataniin guutamee
eebbaaf mammaaksi
weedduufi geerarsi
mirga namummaa kee
haalamuu kan keetiin
mirga sabummaa kee
sarbamuu kan keetiin
quuqamni kee marti
aartiidhaan himamee
dhalli walii dhaame!!
akkas jedhee hime…
waaq roobee biqilchee
biqilaa nuu laatee
dilbiisaa nuu tolchee
gar-laafina keenyaan
arangamaaf rirmaan
magariisa nyaatee
hoongetti nugalche!!
waaq-jiraaf waaq-kennaan
nukeessaa dhabamee
waakkii fi wal-ganuun
waan inbeekne baanaa
waan ofii hiyaanneen
akka waan yaannutti
waajjira diraamaan
waan yaanneen diramne!
